1. 定期檢查制動（煞車）系統
例行驗車嘅時候記得提提師傅檢查埋制動（煞車）系統，包括檢查Brake皮（煞車片）及Brake油。Brake皮係消耗性部件，一般新嘅Brake皮有12-15mm厚，係煞車嘅過程入面，Brake皮會越磨越薄，當佢嘅厚度得返約4-5mm，即大約1/3厚度，車主就要多加留意；到得返2-3mm，就有需要加換啦，否則會減低安全性，同時有機會令Brake碟（制動碟）或鮑魚（制動鉗）損壞。此外，如果煞車時有異常嘅聲響，就要即時檢查，因為有可能係Brake皮已經磨損到唔可以正常運作嘅水平。仲有，Brake皮要定期睇住之餘，Brake油都要定期更換，一般建議每4萬公里/2年換一次，以策安全。
2. 定期換油（偈油及波箱油）
汽車最基本嘅定期保養一定係定期換油，講嘅油係偈（引擎機油）同波箱油。前者係引擎嘅潤滑油，有保護引擎同確保引擎正常運作嘅作用。傳統上，車房會建議每5,000公里/ 半年（以較快者為準）換一次偈油，如屬新車可延至每10,000公里/1年。不過有關時間都係僅作參考，最好都係跟番每間車廠嘅原廠指引同使用手冊，會比較合適。除上述期間要換偈油，車主亦應該定期檢查偈油尺，睇吓偈油是否足夠，因為個別車款係會出現食偈油嘅情況。如果剛換油無耐部車嘅偈油水平已去到好低，咁部車就可能有漏油問題，要快啲搵原廠/ 車房跟進。
至於波箱油，車房一般建議每10,000公里/1年換一次，新車可稍延長，但依家唔同車廠對波箱油更換嘅指引出入都幾大，有啲甚至建議唔需要更換，呢方面建議聽取返原廠/ 車房嘅意見會比較好。
3. 切勿胡亂改裝
雖然係香港改裝汽車係要作出申請，但仍有唔少朋友熱衷於改車。小至一個高流量風格、胎鈴，到避震，進氣/排氣系統等等都有人改，務求提高汽車外觀及性能。改車固然要作出合法嘅申請，但即使是合法改裝，唔適當嘅設定都有可能縮短部其他零件嘅壽命，即使係近年流行，用嚟提升馬力同扭力嘅汽車電腦升級，都會加大引擎同波箱嘅負擔，令佢哋提早「打柴」，甚或影響行車安全。所以大家千祈唔好亂咁進行改裝，即使係進行合法改裝都要搵專業技師幫手呀！
4. 避開路面凹坑
雖然香港嘅公路都鋪得算靚，但有啲路段，尤其係大雨或水浸過後，路面都會有D凹凸不平嘅情況，加上有時去到鄉郊地方，路面可能會有尖石、碎石、泥坑等等，呢啲唔理想嘅路面情況，都有機會破壞部車嘅輪胎同避震系統，亦有可能刮到車底。其實唔單止凹坑，有啲設計得唔好嘅減速帶，或者起伏不平嘅路面，都會帶嚟呢啲破壞。 如果見到路面有坑位凹位，係安全情況下最好梗係避開，如果避冇可避，或者係一啲唔平順嘅路面，最好就係減速慢慢駛過。萬一真係一時唔留神高速過坑，搞到部車發出聲響或者搖晃，之後就要留意吓行車有冇出現異常感覺，如果有就要盡快返廠/搵師傅睇睇啦
5. 善待汽車電池
汽車電池同車胎一樣，都係壽命較短嘅部件。汽車電池最主要嘅功能當然係撻車，即發動引擎啦。此外，車燈、車上嘅音響同導航系統等等，都要靠電池供電。一般汽車電池嘅壽命大約係2-3年，如果使用得宜，壽命都可以延長多1-2年不等。首先，最好唔好係熄左引擎嘅情況繼續用電，例如開住車箱內嘅燈同音響等，因為喺呢個情況下，電池只會放電而唔會充電，會對電池造成淨消耗。即使係行車期間，如果唔需要用到車頭大燈、高燈同霧燈等，就最好熄咗佢，減少消耗。此外，泊好車之後都要留意車頭燈有無開住。如果唔記得熄燈，好大機會耗乾電池，搞到之後撻唔到車。另外，即使唔需要經常用車，最好每隔1、2個星期都要撻一撻車，避免電池放空。
當部車返廠/ 去車房做定期保養時，師傅一般都會幫手Check埋電池容量，如果電池容量係低於一半，或接近1/4水平，最好就係及早更換啦，免得喺街突然撻唔著車，要搵「過江龍」(Jump Starter)搭電撻車，或者拖車去換電。
